Ankandi i bonove në euro

Top Channel ka mësuar se në ankandin e mbajtur në Bankën e Shqipërisë, bankat dhe individët kanë pranuar t’i ofrojnë qeverisë vetëm 11 milionë euro nga 15 milionë që kishte kërkuar Ministria e Financave.

Sipas burimeve të Top Channel, interes me të cilin bankat dhe individët e kanë ofruar këtë borxh për qeverinë varion nga 4.5 në 6.5 për qind. Ministria e Financave synonte të merrte 100 për qind të shumës së shpallur, por kjo nuk është ofruar nga tregu.

Sipas burimeve nga Ministria, kjo lidhet me faktin se ky ishte ankandi i parë i këtij lloji që është zhvilluar në tregun e brendshëm dhe publiku nuk ka qenë plotësisht i informuar.Vendimi i qeverisë për të kërkuar borxh në valutë nga individët erdhi pasi, disa nga bankat më të mëdha në vend filluan të ulnin huadhënien për qeverinë me ritme shumë të shpejta për shkak të kushteve të vendosura nga Bashkimi Europian.

Sipas Bankës së Shqipërisë, njëra nga bankat më të mëdha private uli në vetëm brenda tre muajsh peshën në borxhin e brendshëm publik me 3 pikë përqindje duke e vendosur qeverinë në vështirësi për të financuar borxhin e saj. E gjendur përballë kësaj situate Ministria e Financave prej disa muajsh ka nisur një fushatë të gjerë informimi për të nxitur individët që t’i investojnë kursimet e tyre në letrat me vlerë të qeverisë, si një investim me garanci maksimale.  

Në fakt shifrat tregojnë se përtej sigurive, investime në letrat me vlerë në euro është edhe fitimprurës krahasuar me investimet e tjera alternative.

Top Channel