Zhurmat, gjobiten lokalet
08/07/2012 00:00
Kushte të paqëndrueshme atmosfetike dhe reshje shiu gjatë mesditës, parashikimi i motit për këtë të martë 17/03 07:10
14 nga 15 subjektet e shërbimit publik të cilat kryejnë aktivitetin e tyre në orët e vona të natës, pranë zonave të banuara në kryeqytet, janë penalizuar mbrëmjen e së shtunës gjatë kontrollit të kryer nga inspektorët e Drejtorisë së Kontrollit në Ministrine e Mjedisit, Inspektoriatit të Mjedisit dhe Agjensisë Rajonale të Qarkut Tiranë dhe Institucionit të Shëndetit Publik.
Dy prej subjekteve janë ndëshkuar edhe me pezullim të aktivitetit. Kështu deklaroi Drejtori i Kontrollit për mjedisin Alfred Deshati, i pyetur për aksionet e ndërmarra kundër zhurmës në vendet publike. Sipas tij aksioni ka vijuar edhe në zonat bregdetare.
Gjatë fundjavës në Vlorë, e sidomos në zonën e plazhit janë penalizuar mbi 30 subjekte, ndërsa në qytetin e Durrësit, megjithëse 9 subjekte janë të pajisur me leje mjedisore, gjatë kontrollit 6 prej tyre janë gjobitur për shkak se nuk i plotësonin kërkesat e lejes. Edhe në Shkodër ka patur 3 raste ndëshkimesh me gjobë.
Inspektorët kanë deklaruar se aksioni do të vazhdojë për të gjithë periudhën e verës e sidomos fundjavave, duke ndëshkuar sidomos aktivitetet e palicensuara pranë zonave të banuara, në mënyrë që të ruhet shëndeti publik dhe të mos ketë ankesa nga qytetarët.
Sipas tyre edhe rastet kur subjektet janë të pajisur me licencë mjedisore, por që nuk i plotësojnë kushtet e saj, janë të shumta. Megjithëse ligji për pajisjen me leje mjedisore për subjektet e shërbimit publik që kanë muzikë në ambientet e tyre është në fuqi që nga viti 2007, vetëm një numër shumë i pakët prej tyre në gjithë territorin e Shqipërisë janë të pajisur me këtë leje.
Top Channel
