Humbësi i zgjedhjeve presidenciale në Egjipt u largua të martën nga vendi për në Emiratet e Bashkuara Arabe, konfirmoi avokati i tij dhe një zyrtar i aeroportit të Kajros.
Sipas burimeve, ish-funksionari i regjimit të Mubarak, humbës përballë kandidatit të Vëllazërisë Muslimane, Mohammed Mursi, është larguar për një periudhë të pacaktuar nga Egjipti.
Megjithatë, avokati i tij u shpreh se Shafiq nuk është duke u zhvendosur përfundimisht nga Egjipti.
Disa çështje korrupsioni nisën të përfliteshin ndaj Shafiq në muajin prill, por prokurorët nuk kanë nisur asnjë çështje ndaj kandidatit presidencial, i cili ishte njëkohësisht edhe kryeministri i fundit i regjimit 32-vjeçar të autoritarit Mubarak.
Në fundjavë, Mursi u shpall zyrtarisht fitues i zgjedhjeve dhe nisi punën për formimin e qeverisë së re të vendit, e para e zgjedhur në mënyrë demokratike prej disa dekadash.
Mbetet për të parë me interes ekuilibri i ri që do të gjejë vendi midis qeverisë civile dhe forcave ushtarake, që kanë një ndikim të gjerë në jetën politike në vend dhe në bazë të kushtetutës, mund të kufizojnë apo rrëzojnë qeverinë e ligjshme.
Që prej rrëzimit të Mubarak në shkurt 2011, për pothuajse një vit e gjysmë, Egjipti u drejtua nga Këshilli i Lartë Ushtarak.
Top Channel
