Neonazistët gjermanë ndihmuan terroristët palestinezë që të vrasin 11 atletë hebrenj gjatë Lojrave Olimpike të Mynihut, në vitin 1972.
Kjo e dhënë është bërë publike nga deklasifikimi i sekreteve shtetërore gjermane, 40 vjet pasi kjo ngjarje ka ndodhur.
Midis 2 mijë faqeve që janë publikuar nga arkivat, fajësohet si bashkëpunëtor me njësinë e Organizatës për Çlirimin e Palestinës neo-nazisti Willi Pohl, i cili vazhdon të jetojë në Dortmund.
Sipas të dhënave, njeriu që udhëhoqi sulmin famëkeq, Abu Daoud, u prit dhe qarkulloi në Gjermani falë ndihmës së Pohl, i cili nga ana e tij u bë ndërmjetës dhe i furnizoi palestinezët me pasaporta falso.
I pyetur së fundmi, 68-vjeçari Pohl, i cili ka folur me kusht që fotografitë dhe të dhënat e tjera të jetës së tij të mos bëhen publike, pretendon se nuk kishte dijeni për organizimin e sulmit ndaj hebrenjve.
Ai u arrestua në Mynih në tetor 1972, një muaj pas masakrës dhe u dënua me dy vjet burg për armëmbajtje pa leje.
Megjithatë, ndonëse lidhja e tij në këtë masakër ka qenë e dokumentuar sipas shërbimeve sekrete, këto lidhje nuk u vendosën asnjëherë në hetim nga policia.
Në 5 shtator 1972, gjatë zhvillimit të Lojrave Olimpike, një njësi tërroriste hyri në fshatin olimpik në Mynih në dhomat e disa atletëve hebrenj, dy prej të cilëve u vranë në moment në rezistencën që zhvilluan.
Policia gjermane arriti të realizonte një marrëveshje, në bazë të së cilës terroristët dhe pengjet e tyre do të lejoheshin të transferoheshin në një aeroport, nga i cili do të udhëtonin në Egjipt, ku do të lejonin atletët të riktheheshin në vendin e tyre.
Megjithatë, në momentin përfundimtar në aeroport, snajpera gjermanë nisën të qëllonin, duke i dhënë të kuptonin terroristëve që ishin në një kurth. Si rrjedhojë, ata hodhën granata brenda helikopterëve, të cilët shpërthyen dhe i morën jetën të gjithë atletëve.
Vetëm tre atentatorë mbetën të gjallë dhe u burgosën, për t’u liruar më pas kur një avion i “Lufthansa” u mor peng në vitin 1973 dhe u la vetëm në këmbim të lirimit të tyre.
Dy prej tyre, së bashku me disa organizatorë të tjerë të sulmeve, u vranë në vijmësi nga Shërbimet Sekrete Izraelite të “Mossad”, një një operacion hakmarrje, të quajtur “Shtatori i Zi”.
Top Channel
