Murdoch telefonoi Blair për Irakun

Zbulimi është bërë nga Alastair Campbell, ish-shefi i komunikimeve i ish-kryeministrit britanik, në ditarin e tij që po publikohet nga e përditshmja “The Guardian”.

Sipas Campbell, ka pasur tre telefonata në mars të vitit 2003, domethënë një javë përpara se të mbahej votimi kryesor i Dhomës së Parlamentit mbi Irakun.

Nga ana e saj, “News Corporation”, shoqëria e manjatit australian Rupert Murdoch, përgënjeshtron kategorikisht lajmet duke i cilësuar ato si “mbeturina”.

Ish-kryeministri britanik dëshmoi në fund të muajit të kaluar në komisionin parlamentar për skandalin e përgjimeve, por dëshmia e tij u ndërpre pasi një protestues arriti të hynte në sallë duke shkaktuar kaos.

Protestuesi 49-vjeçar e cilësoi Blair “kriminel lufte” për pushtimin e Irakut, deri sa rojet e sigurisë e nxorrën me forcë për ta çuar në një stacion policie në qendër të Londrës.

Blair tha se nuk kishte pasur ndonjë marrëveshje mes tij dhe manajtit të medias, që media e Murdoch ta mbështeste atë. Megjithatë, ai shtoi se:

“Kur je udhëheqës politik dhe kur ke grupe të fuqishme mediatike dhe i prish marrëdhëniet me një nga këto grupe, pasojat janë të tilla që efektivisht të bllokohet përçimi i mesazhit tek publiku”.

Top Channel