”Nuk ka para për kapjen e Konyt”

Në një raport prej 14 faqesh drejtuar Këshillit të Sigurimit të OKB-së, Ban i kërkoi vendeve më të fuqishme në botë që të ofrojnë ndihmën e tyre, ndërsa theksoi se vetëm trupat e një koalicioni të superfuqive botërore ka shanse reale në eleminimin apo prangosjen e një prej njerëzve më të kërkuar në botë.

”Nisma e Bashkimit Afrikan për kapjen e Konyt vuan nga mungesa e theksuar e fondeve dhe kapaciteve ushtarake. Pa resurset e nevojshme, BA do ta ketë të pamundur të përmbushë këtë detyrë thelbësore për sigurinë në Afrikë”, shkruhej në një pjesë të raportit të kreut të OKB-së.

Bashkimi Afrikan vendosi si një prej përparësive të tij kapjen e Konyt, duke krijuar një trupë prej 5 mijë ushtaresh për ta luftuar, pasi rikthimi i rebelizmit të tij në mars la dhjetëra të vdekur e mbi 450 mijë persona të zhvendosur nga Uganda, Sudani i Jugut, Republika Demokratike e Kongos dhe Republika Afrikane Qëndrore.

Kony është i kërkuar nga Gjykata Ndërkombëtare e Krimeve në Hagë për krime lufte dhe krime kundër njerëzimit.

Një dokumentar i famshëm tregoi më parë gjatë vitit se si ushtria e rebelit përdorte forcën për të rektrutuar fëmijë në radhët e saj dhe i përdorte më pas si ushtarë apo skllavë seksualë.

Presidenti i SHBA-ve, Barack Obama, dërgoi 100 trupa në 2011-n në Afrikë në përpjekje të organizimit të një ndjekje më efikase ndaj Konyt, por problemi i mungesës së financimeve ka bllokuar për momentin luftën ndaj të shumëkërkuarit.

Top Channel