Danimarkë, katër fajtorë për terrorizëm

Të pandehurit, Munir Awad, Omar Abdallah Aboelazm, Munir Ben Mohamed Dhahri dhe Sabhi Ben Mohamed Zalouti u arrestuan ndërsa përpiqeshin të vendosin eksplozivë në redaksinë e gazetës “Jyllands-Posten”.

Sulmi i tyre motivohej nga dëshira për t’u hakmarrë në lidhje me publikimin e disa karikaturave të Profetit Muhamed, në vitin 2005, nga e përditshmja në fjalë.

Të katërt muslimanët radikalë ishin banorë në Suedi dhe ata u prangosën vetëm disa orë përpara se të vinin në jetë planin e tyre.

Masa e dënimit do të jepet në një seancë të dytë, më vonë gjatë muajit dhe secili prej tyre mund të dënohet deri në 16 vjet burgim.

Publikimi i “Jyllands-Posten” solli protesta të ashpra në vendet islamike, të cilat i konsideruan karikaturat një fyerje të rëndë.

Në fenë muslimane, riprodhimi i imazheve të Zotit, Profetit Muhamed apo Profetëve të tjerë është i ndaluar për arsye fetare.

Top Channel