AK: Do të hapim bursën

Kreu i kësaj Aleance, Kreshnik Spahiu deklaroi gjatë tryezës me temë “drejt një tregu gjithëshqiptarë se do të krijohet një bankë nacionale shqiptare, si dhe do të krijohet bursa kombëtare.

“Të ndërtojmë korporatat e mëdha shqiptare me kapitale disa qindra milionë euro dhe me pjesëmarrjen mazhoritar të kapitalit popullor shqiptar nga të gjitha trevat shqiptare të grumbulluara nëpërmjet bursës së Tiranës sipas modelit francez, e pse jo nëpërmjet ndërtimit të një banke nacionale shqiptare, e pse jo, kur sot një përqindje shumë të madhe të bankave në Shqipëri i kanë fqinjët tanë grekë”, tha Spahiu.

Duke e konsideruar kryeministrin e vendit si një sekretar partie që po ndrydh ekonominë shqiptare, Spahiu deklaroi se do të ketë rishikim të koncesioneve abuzive dhe korruptive me mafian serbe dhe greke.

Spahiu deklaroi se ky vend është në krizë pasi qeveriset nga talebanët.

“Ky vend është i varfër sepse drejtohet nga mendje të varfëra, ky vend po kthehet në shkretërirë afgane sepse ne kemi politikanë talebanë që na qeverisin”, akuzoi kreu i AK-së, Kreshnik Spahiu.

Top Channel