SHBA, Santorum “bekon” Romney

Në një email të dërguar gjatë orëve të natës, ai u bëri thirrje mbështetësve të tij që të mbështesin kandidatin e emëruar për t’i pamundësuar presidentit Obama marrjen e mandatit të dytë.

Zoti Santorum tha se ishte i impresionuar nga “mirëkuptimi i thellë” i zotit Romney për çështjet ekonomike dhe familjare, pas një takimi të zhvilluar me të javën e kaluar.

Mbështetja e tij tani mund të ndihmojë zotin Romney që të sigurojë terren edhe lidhur me çështjet fetare konservatore.

Rick Santorum i dha fund garës së tij për në Shtëpinë e Bardhë në muajin prill, pasi Romney arriti një kuotë të pakalueshme.

“Mbi të gjitha, ne të dy biem dakord se presidenti Obama duhet mposhtur. Detyra jonë nuk do të jetë e lehtë. Ajo do të kërkojë gjithë mbështetjen që kandidati ynë të shpallet fitues”, tha Santorum.

“Guvernatori Romney do të jetë i emëruari dhe ai ka miratimin dhe mbështetjen time për të fituar në zgjedhjet më kritike të jetës sonë”, shtoi ai.

Zoti Santorum u përlesh ashpër me zotin Romney gjatë debateve mes kandidatëve për të emëruarin dhe në një moment ai e cilësoi atë si republikanin më të keq që mund të sfidojë Obamën.

Top Channel