Monumentet me koncesion

Diskutimi ka marrë nota politike kur anëtarë të ndryshëm të Komisionit, përfaqësues të dy forcave më të mëdha politike në vend, janë përpjekur t’i ngarkojnë fajin njëri-tjetrit për keqfunksionimin e koncesioneve të dhëna deri tani.

 “Askush nga deputetët nuk është shprehur kundër nismës në vetvete. Thelbi i debatit ka të bëjë me modelin. Kush është modeli dhe sa bazë ligjore ka ai”, u shpreh Valentina Leskaj, kryetare e Komisionit të Medias.

“Kundërshtitë janë pjesë e luftës politike dhe interesave të ngushta. Këta zotërinj shpresojnë të kthehen në pushtet dhe këto kala t’i marrin siç i kanë marrë dikur”, theksoi Edi Paloka, anëtar i Komisionit të Medias.

Ndërkaq Bumçi e ka mbrojtur këtë iniciativë duke cituar se ka qenë një praktikë e suksesshme në shumë vende të botës: “Trashëgimia kulturore e Shqipërisë vlerësohet si nga potencialet kryesore për të zhvilluar turizmin. Si mundet ta shfrytëzojmë këtë potencial nëse ne nuk ofrojmë as shërbimet minimale në parqet arkeologjike dhe në monumentet e kulturës.”

Ndërkaq anëtarët e Komisionit kanë shprehur shqetësimet e tyre lidhur me realizimin e kësaj nisme.

“Trashëgimia qindravjeçare të lihet në dorë të një privati që e ka rregulluar me persona të veçantë në ministri do të ishte një shkatërrim total”, deklaroi Fatmir Toçi, anëtar i Komisionit të Medias.

Top Channel