Dita botërore e lirisë së medias

“Në Shqipëri, panorama ka qenë e përzier. Nga ana pozitive u pa përparim në miratimin e legjislacionit të rëndësishëm për shpifjen. Ky ishte një hap i vërtetë përpara. Megjithatë, nga ana tjetër, raporti vjetor i Departamentit të Shtetit për Të Drejtat e Njeriut vërente një numër fushash që kanë nevojë për përmirësim”, tha Arvizu.

“Media është aktive dhe në masë të gjerë e pakufizuar; megjithatë, pati raste presioni politik të drejtpërdrejtë ose të tërthortë mbi median, përfshirë kërcënime ndaj gazetarëve. Në disa raste presioni politik dhe mungesa e fondeve kufizuan median e shkruar të pavarur, e gazetarët raportuan se kishin ushtruar gjerësisht vetëcensurë”.

Ambasadori amerikan, Aleksander Arvizu i referohet konstatimeve për censurën dhe mungesën e kontratave të punës që i bën shpesh gazetarët të raportojnë në mënyre jo objektive.

“Ambasada e SHBA në Tiranë shpreson që të gjithë aktorët, Parlamenti Shqiptar, organizatat e medias, si dhe vetë gazetarët, do të ecin përpara me një përpjekje të përbashkët për të kryer ndryshimet e duhura që do të çojnë përpara larminë e medias në Shqipëri. E ardhmja e drejtë e Shqipërisë në Bashkimin Europian varet nga një media e fortë dhe e pavarur”, tha ai.

Diplomati amerikan në Tiranë thotë se në disa raste, nuk janë vetëm qeveritë që sulmojne, kanosin dhe kërcënojnë gazetaret. Janë kriminelët, kartelet e drogës, terroristët apo fraksionet politike. Duke nënvizuar këtë ai flet për pasojat që vijnë: “Kur gazetarët kërcënohen, sulmohen, burgosen, apo zhduken, gazetarët e tjerë vetëcensurohen. Nuk raportojnë më lajmet. Ulin tonet e lajmeve. Lënë hollësi pa përmendur. Burimet nuk i ndihmojnë më. Redaktorët hezitojnë të botojnë artikuj. Vendin e së vërtetës e zë frika. Të gjitha shoqëritë tona vuajnë”, theksoi Arvizu.

Në artikullin e tij, që erdhi në këtë ditë të rëndësishme për lirine e medias, Arvizu i bën një panoramë zhvillimeve në politikën botërore, nga Lindja e Mesme në Afriken e Veriut, ku gazetarët, blogerat, producentet dhe analistet u bën kronikane, duke patur një armë të vetme në dore, celularët, duke rrezikuar jetën për të shkruar të verteten, me tekst, tëiter dhe piksel.

Top Channel