Të paktën 400 të burgosur u arratisën nga një burg në Pakistan, pasi u sulmuan prej militantëve, konfirmuan të dielën burime zyrtare.
Besohet se një brigadë prej më shumë se 100 luftëtarësh lëshoi një sulm të koordinuar mbi qëndrën e vuajtjes së dënimit rreth orës një të mëngjesit.
Midis të arratisurve, ishin edhe disa prej islamistëve më të rrezikshëm në vend, përfshirë disa të dënuar që prisnin të zbatohej dënimi i tyre me vdekjes, pas një tentative të dështuar për vrasjen e ish-presidentit Pervez Musharraf.
Burgu ndodhej pranë qytetit të Banus, më krahinën Kiber Paktunkhva, e cila kufizohet nga rajonet tribale ku autoriteti shtetëror pothuajse nuk ka asnjë lloj ndikimi.
Talebanët pakistanas, nëpërmjet një komunikate morën përsipër autorsinë e sulmit. Nuk është e qartë se cili është bilanci i viktimave të sulmit, gjatë të cilit militantët përdorën armë të kalibrit të rëndë, granata dhe predha antitank për të shpërthyer muret.
Sulmi i së dielës është i ngjashëm me atë që ndodhi një vit më parë në Kandahar, kur një tjetër brigadë militantësh arriti të lironte nga burgu 470 të burgosur, përfshi komandantë dhe luftëtarë talebanë.
Top Channel
