Supersfida Skënderbeu-Tirana

Tirana shkon e plotë në këtë takim, përveç Tushes i cili është i pezulluar dhe është dënuar me 6 javë për një gjest jo sportiv në ndeshjen e fundjavës së shkuar me Apolloninë.

Pikërisht për këtë trajneri Rubio duket shumë i nevrikosur: “Të dëmtuar nuk kemi, kemi një mungesë për shkak dënimi që është Tushe dhe më duket një padrejtësi e madhe ajo që u bë ndaj tij, pasi ka marrë një dënim sikur ka vrarë ndokënd. Une besoj se duhet ta rishoh këtë ndëshkim pasi nuk është aspak i drejtë. Pjesa tjetër e skuadrës është e mirë përveç disa lojtarëve që kanë 3-4 javë që nuk kanë bërë stërvitje me ritëm të plotë.”  

Sa i përket përballjes direkte, Rubio mendon se do të përballen si të barabartë, pasi nuk i trembet kampionëve.

“Ne do të përballemi me atë Skënderbe që do të jetë në fushë dhe nuk i druhemi. Nuk jam parashikues të them se sa shanse kemi, por mund të siguroj që ne do të futemi në fushën e lojës për të fituar dhe për të luajtur ndershmërisht”, thekson tekniku spanjoll.  

Ndërkohë si rrallë herë trajneri çek i Skëndrbeut Stanislav Levi në një konferencë për shtyp ka theksuar të njëjtat gjëra me kolegun e tij spanjoll: se do të futet në fushën e lojës për të njëjtin qëllim, për të fituar e për të dalë me sukses nga këto 90 minuta.

“Na pret një ndeshje e vështirë këtë fundjavë me një kundërshtar që ka të njëjtat synime. Skuadra jonë kundërshtare e së shtunës është e përgatitur mjaft mirë nga trajneri Rubio, prandaj kjo do të jetë një ndeshje e fortë e luajtur në një atmosferë të shkëlqyer. Ne do të bëjmë maksimumin që të fitojmë ndeshjen e të festojmë ne në fund”, deklaroi Levi.

Duket se e pret një atmosferë e zjarrtë këtë përballje mes Tiranës dhe Skëndërbeut, një ndeshje e cila në këto dy vitet e fundit është shndërruar në derbin e Shqipërisë. Atmosfera në Korçë gjithmonë ka qenë model dhe spektakolare në ndeshje të tilla, aq më tepër kur nga Tirana do të nisen rreth 600 tifozë për të mbështetur skuadrën e tyre të zemrës.

Gjthçka rreth kësaj supersfide do të zbulohet ditën e shtunë në orën 19.00, në stadiumin e Skëndërbeut.

Top Channel