Spanjë, protesta të reja ndaj buxhetit

Kryeministri Mariano Rajoy ka paralajmëruar popullatën se shkurtimet do të jenë ndër më të ashprat e njohura ndonjëherë.

Ditën e enjte, policia spanjole u përball me protestues të dhunshëm, gjatë një greve të përgjithshme të shpallur nga sindikatat në vend kundër reformave që do të thellojnë edhe më shumë plagën e papunësisë.

Edhe më shqetësues janë zërat se pavarësisht masave të ashpra, Spanja nuk do të mund të shmangë dot nevojën për një kredi madhore, për të rivendosur në binarët e duhur ekonominë e saj.

Aktualisht, vendi përballet me normën e papunësisë më të lartë brenda vendeve që përdorin monedhën e përbashkë euro, me 24% të forcës së aftë për punë dhe që po e kërkon një të tillë që nuk është e aftë ta gjejë.

Gjithashtu të enjten, Ministrat e Financave të Eurozonës u takuan në Kopenhagen dhe miratuan rritjen e fondit të shpëtimit, që do të garantojë çdo shtet që mund të preket nga kriza e euros në të ardhmen.

Siç u vendos, fondi rezervë do të jetë prej 800 miliardë eurosh, që do të financohen nga buxhetet kombëtare të vendeve të BE-së, FMN dhe investitorë të tjerë.

Ndonëse ishte kërkuar që fondi i shpëtimit të caktohej në një trilion euro, fiksimi i tij në 800 miliardë përbën gjithsesi një rritje të ndjeshme nga rezerva pre 500 miliardë dhe u ofron garanci të mëtejshme biznesit.

Top Channel