Nuk do të ketë revolucion tek Interi, të paktën jo për momentin.
Massimo Moratti nuk ka ndërmend të shkarkojë Claudio Ranierin pas eliminimit të zikaltërve nga Liga e Kampioneve.
“Në një mbrëmje si kjo nuk më duket e drejtë të marr masa. Nuk ka faj trajneri, por kolegu i tij francez (Didier Deschamps) kishte më shumë fat sot”, u shpreh presidenti i Interit menjëherë pas ndeshjes.
Para se të largohej nga stadiumi, Moratti shtoi për mediat italiane: “Nëse do të kishim humbur 4-0 do të mendoja ndryshe, por kemi pësuar dy gola në kohën shtesë dhe nuk mund të jap një gjykim negativ për teknikun sepse Ranieri nuk e meriton gjykimin negativ.”
Ndërsa vetë Ranieri theksoi: “Për momentin Interi është ky. Nëse Moratti do të vendosë të më zëvendësojë sezonin e ardhshëm do e falenderoj për mundësinë që më dha.”
Deschamps: Një rezultat i madh për Marseille
Didier Deschamps, tekniku i Marseille, u shpreh shumë i lumtur në konferencën për shtyp pas humbjes 2-1 që skuadra e tij pësoi në San Siro, rezultat që i dha kualifikimin pasi në ndeshjen e parë francezët kishin fituar 1-0.
“Është një kënaqësi e madhe sepse në kampionat po kalojmë momente shumë të vështira. Jemi një klub i vogël, ndërsa Interi një skuadër e madhe. Është një lumturi e jashtëzakonshme të humbësh në këtë mënyrë. Shpresojmë që shorti të na ndihmojë në çerekfinale, por ne e kemi arritur objektivin tonë që i kishim vënë vetes në fillim të sezonit”, theksoi tekniku francez.
Top Channel
