Teksa në Prishtinë po vazhdon debati rreth përfaqësimit të Kosovës dhe marrëveshjeve ndërmjet Kosovës dhe Serbisë, në Mitrovicë nuk vërehet as edhe një ndryshim i vetëm.
Të gjitha rrugët që të çojnë në veri vazhdojnë të mbeten të bllokuara, qysh nga korriku i vitit të shkuar. Në terren nuk vërehet as edhe një lëvizje që mund të çojë në heqjen e tyre.
Ndërkohë lidhja ndërmjet shqiptarëve dhe serbëve në Mitrovicë mbetet biznesi. Në pothuajse të gjitha dyqanet e shqiptarëve mund të hasësh në blerës serb. Për më tepër në lagjen e Boshnjakëve në pjesën veriore, banorët e lagjes treguan jashtë kamerave se vetëm në muajin e fundit 7shtëpi të shqiptareve janë shitur në këtë lagje.
Banorëve tashme iu kanë humbur shpresat për përmirësim të situatës, megjithatë ata thonë se të paktën situata e sigurisë është e qetë, ndërkohë banorët serbë hezitojnë të flasin.
I ashtuquajturi kryeshef i Qarkut të Mitrovicës, Radenko Nedelkoviq ka tërhequr vërejtjen se në Veri mund të ketë probleme serioze, pasi sipas tij, vullneti i popullit, i dalë nga referendumi duhet të respektohet e kjo do të thotë se popullata e veriut nuk dëshiron kurrfarë institucionesh të Kosovës në këtë pjesë të vendit.
Sipas tij për popullatën serbe në veri dhe përfaqësuesit e saj, është i papranueshëm fakti që në pikëkalimet mes Kosovës dhe Serbisë qendrore të ketë dogana. Probleme rreth kësaj çështje ka pasur edhe në ditët e shkuara ku serbët lokalë kanë penguar qarkullimin e makinave të Eulex-it. Për këtë arsye serbët e veriut mbajtën edhe një tubim simbolik këtë të enjte.
Top Channel
