Serbia gjendet në tension për shkak të bisedimeve me Kosovën në prag të vendimit të ri për statusin e kandidatit për integrim në Bashkimin Europian.
Shefi i diplomacisë gjermane, Guido Vestervele do të mbërrijë në kryeqytetin serb në orët e mbrëmjes për një takim të papritur me presidentin serb, BorisTadic me të cilin do të diskutojë për mundësinë e gjetjes së zgjidhjeve për të plotësuar kushtet që ka paraqitur BE-ja dhe Gjermania për të dhënë pëlqimin për integrim.
Kjo vizitë vjen edhe pas pesimizmit të shprehur nga ana e presidentit Tadic për mundësinë e zgjidhjes. Ai akuzoi Kosovën për qasjen e saj. Gjermania është një nga vendet që ka insistuar për zgjidhjen e problemeve në veri.
Ndërkaq, siç është bërë e ditur, serbët e veriut së bashku me xhandarmërinë serbe kanë hequr barrikadat në pjesën në mes të pikëkalimeve kufitare Rudnica deri në Jarinjë, në pjesën e Kosovës që kontrollohet nga KFOR-i.
Nëse nuk arrihet asnjë marrëveshje dhe Serbia nuk fiton statusin e kandidatit, kjo mund të prodhojë tensione në politikën serbe.
Top Channel