Aeroplanmbajtësja amerikane Abraham Lincoln është zhvendosur përtej Ngushticës së Hormuzit, pranë brigjeve iraniane, për herë të dytë gjatë javëve të fundit.
Sipas një korrespondenti të BBC, në një moment, aeroplanmbajtësja u afrua në vetëm dy milje nga një luftanije patrulluese iraniane.
Aeroplanmbajtësja mbrohej nga një kryqëzor dhe destrojer. Zhvendosja e trupave të shumta ushtarakë amerikane në zonë erdhi pasi Irani kërcënoi me mbylljen e ngushticës me rëndësi kritike për tregjet ekonomike ndërkombëtare.
Abraham Lincoln në zonë shpreh edhe një herë qartë vullnetin e Uashingtonit për të mos rrezikuar mbylljen e Hormuzit, nga ku kalojnë 35% eksportit të naftës drejt vendeve perëndimore, qoftë për një periudhë të shkurtër kohe.
Një luftanije franceze ka mbetur në zonë që prej shoqërimit të aeroplanmbajtëses në fjalë në rrugën e saj të parë, në janar.
Shtetet e Bashkuara të Amerikës dhe Bashkimi Europian kanë vendosur embargo mbi të gjithë prodhimin iranian të naftës, për shkak të ambicieve bërthamore të vendit aziatik me 75 milionë banorë.
Top Channel
