Dëbora, situata në Kukës

Më shumë se 30 burra të fshatit Orgjost shoqëruan natën e 7 shkurtit me barrel 27-vjeçaren Firmire Hoxha për të ndihmuar në lindjen e dy binjakëve të saj. Në kushte ekstreme, ku rrugët ishin të bllokuara, temperatura shënonte -15 gradë Celsius dhe bora kishte arritur lartësinë 1 metër, burrat ndihmuan bashkëfshataren e tyre duke e transportuar deri në një pikë ku mund të arrinte makina.

Duket si një skenar filmi, por në fakt është histori e vërtetë e familjes Hoxha nga fshati Orgjost, shumë pranë kufirit me Kosovën. Mamaja e dy bebeve të vogla thotë se nuk mban mend asgjë nga ajo natë e ftohtë dimri kur në kushte jonormale arriti deri në maternitetin e Kukësit.

“Jetën e kam prej atyre burrave që më çuan në maternitetin e Kukësit”, shprehet 27-vjeçarja.

Bashëkshorti i saj, Kamomil Hoxha, i lumtur për ardhjen në jetë të dy vajzave të tij tregon orët e asaj rruge të vështirë: “Rruga ka qenë shumë e keqe, është nisur një ambulancë por s’ka ardhur dot sepse ngeci në borë.”

Situata nga reshjet e borës në qarkun e Kukësit është akoma më e rëndë. Sekretarja e përgjithshme prefekturës Kukës, Lebibe Tota, thotë se situata më e vështirë është në komunat e thella të Kukësit si dhe në rrethin e Tropojës.

“Në qarkun e Kukësit prej disa ditësh kushtet janë shumë të vështira si pasojë e të ftohtit. Komunat Shishtavec, Topojan dhe Zapod janë të bllokuara. Akset problematike janë në Valbonë, komunat Bujan, lekbibaj dhe Bytyç vuajnë izolimin”, thekson Tota.

Është ftohtë dhe nëpër rrugët e Kukësit ka shumë pak lëvizje. Dikush pastron borën dhe makinat lëvizin me vështirësi. 12 kilometra më larg është komuna Bicaj.

Në 10 fshatrat e kësaj komune vetëm njëri është plotësisht i izoluar dhe është e pamundur të shkohet. Arben Korbi, kryetari i komunës, thotë se sipas informacioneve gjendja në fshat është ende e përballueshme: Është një fshat me 40-50 familje që vazhdimisht bllokohet sepse është tepër malor. Ai është një fshat 1800 metra mbi nivelin e detit, por kemi lidhje me të dhe nuk ka pasur probleme emergjente.”

Në fshatin Bicaj ku bora ka kaluar 1 metër duket se momentet më të gëzueshme janë për fëmijët. Prej një jave 87 shkollat e qarkut Kukës janë të mbyllura.

Fshati Bicaj prej pothuajse tre javësh është mbuluar nga dëbora. Më të vjetrit e zonës e thonë se situata të tilla në fshatin e malor janë të përsëritura.

Përsëritja e situatave të vështira vit pas viti ka bërë që banorët të marrin masa rreth 6 muaj para duke sigurura ushqimet e nevojshme për vete dhe për gjënë e gjallë.

“Jemi përgatitur, por nëse kjo gjendje zgjat shumë do të kemi probleme”, shprehet një banor.

Top Channel