Të paktën 88 aksidente trafiku është bilanci aktual pas reshjeve të mëdha të borës në gjithë Kosovën.
Ndërkohë nga qendra emergjente spitalore bëhet e ditur se, vetëm gjatë 24 orëve të fundit më shumë se 12 persona kanë kërkuar ndihmë mjekësore, kryesisht nga aksidentet e trafikut.
Reshjet borës kanë shkaktuar vështirësi të mëdha në qarkullimin rrugor ndërkohë policia njofton se, rrugët magjistrale janë të kalueshme, por rrugët lokale në disa komuna janë të bllokuara. E pakalueshme mbetet vetëm rruga që të çon drejt Malit të zi Pejë-Kullë- Rozhaj.
“Një bllokim total për qarkullim e kemi në vend kalimin kufitar Pejë-Kullë-Rozhajë, për shkak se në territorin e Malit të Zi është bllokuar rruga dhe është dashur të ndërpritet qarkullimi në atë pjesë. Bllokim të disa rrugëve kemi edhe në komunën e Novobërdës, në Dragash, Brezovicë, Prevallë, Shalë të Bajgorës dhe në disa fshatra të komunave të ndryshme”, tha Baki Kelani nga Policia e Kosovës.
Megjithatë më të bllokuara janë rajonet rurale, ku qarkullimi pothuajse është bërë i pamundur. Njëra ndër këto rajone është edhe ai i Novobërdës, me këtë rast kryetari i kësaj Komune, Bajrush Ymeri, ka bërë apel tek të gjitha institucionet qeveritare të Kosovës dhe organizmat e tjerë vendorë ndërkombëtar për ta ndihmuar komunën në hapjen e rrugëve lokale.
Por, gjendja nuk është e mirë në rrugët e kryeqytetit kosovar.
“Aktualisht të gjitha kompanitë janë duke operuar në territorin e komunës së Prishtinës me kapacitet të plotë dhe kapacitet të shtuar. Kapaciteti i shtuar është si rezultat i vlerësimit të gjendjes nga organet e komunës, me ç’rast komuna ka angazhuar edhe kompani shtesë të cilat në mënyrë vullnetare po ndihmojnë. Po ashtu edhe FSK-ja po u ndihmon ekipeve tona. Kjo është bërë për arsye të trashësisë së borës sidomos në pjesët rurale”, thotë Agim Gashi, Drejtori i Shërbimeve Publike KK Prishtinë
Si pasojë e reshjeve të borës edhe gjatë ditës së enjte janë anuluar edhe disa aktivitete shtetërore. Njëra nga to është anulimi edhe i vizitës se ndermjetesit te BE-së për dialogun Prishtinë-Beograd, Robert Kuper në Kosovë.
Ndërkohë që për shkak të motit te keq, deri ditën e hënë është ndërprerë mësimi në të gjitha shkollat e Kosovës.
Top Channel
