Britania përgjoi Rusinë me një gur-spiun

Rusia ngriti dyshimet e saj në janar të vitit 2006, por kjo është e para herë që dikush nga zyrtarët e Mbretërisë së Bashkuar i ka konfirmuar ato.

Jonathan Powell, atëherë shef i personelit të kryeministrit Tony Blair, tha për BBC se ngjarja shkaktoi një siklet të madh.

“Është e qartë që ata kishin kohë që e dinin. Por po e ruanin për ta përdorur për qëllime politike”, deklaroi Powell duke iu referuar rusëve.

Historia u transmetua për herë të parë në një televizion rus, që shfaqi një dokumentar që tregonte se si guri i madh përmbante një pajisje elektronike dhe ishte përdorur nga diplomatët britanikë për të marrë dhe dhënë informacione.

Pamjet tregonin një burrë që ecte përgjatë një trotuari në Moskë, i cili ngadalësonte hapat, fiksonte gurin dhe më pas rifillonte ecjen me hapa normalë. Ndërsa pamje të tjera tregonin më pas një person që merrte gurin.

Shërbimi rus i sigurisë, FSB, e lidhi gurin me dyshimet se shërbimet sekrete britanike po mbështesnin financiarisht grupe pro-demokratike dhe pro-të drejtave të njeriut në Rusi.

Pak kohë pas zbulimit, presidenti i atëhershëm Vladimir Putin paraqiti një ligj që kufizonte organizatat joqeveritare në marrjen e fondeve nga qeveritë e huaja. Për pasojë, shumë prej tyre u mbyllën.

Top Channel