Beogradi: Prishtina vijon të gjuajë me gurë

Zëdhënësi i qeverisë serbe, Milivoje Mihajlovic e ka cilësuar deklaratën e Kucit si “një tjetër gur të hedhur ndaj autokolonës së Tadic” gjatë vizitës në Decan.

“Mendoj se me këtë deklaratë pothuajse e gjithë qeveria e Kosovës është rreshtuar në pjesën ekstreme. Ajo po mundohet t’i afrohet lëvizjes Vetëvendosje dhe të arsyetojë njësoj si ajo”, ka deklaruar Mihajlovic.

Në një prononcim për agjencinë e lajmeve “Beta”, zëdhënësi është shprehur se, Vetëvendosje përbën dekorin që kryeministri Hashim Thaci të shfaqet si demokrat, ndërsa që në bashkësinë ndërkombëtare të tregojë se ka ende shqiptarë ekstremë.

Presidenti i Serbisë, Boris Tadic pas shumë vështirësish arriti të futet në territorin e Kosovës të premten e kaluar, edhe pse rruga e tij për në Manastirin e Deçanit u pengua disa herë.

Një ditë më vonë, ai acaroi banorët shqiptarë pasi tha se Serbia nuk do ta njohë kurrë pavarësinë e Kosovës, të cilën ai e cilësoi si “toka jonë”.

Pas këtyre deklaratave provokuese, Prishtina reagoi nëpërmjet zëvendëskryeministrit Hajredin Kuci, i cili tha se Tadic konsiderohet person “non grata”, për arsye se gjithmonë gjatë vizitave të tij ka lëshuar mesazhe politike.

Gjatë vizitës së tij të vështirë, Tadic, bashkë me besimtarët ortodoksë që ndoqën ceremoninë e Liturgjisë së mëngjesit në Manastirin e Decanit, nuk nguroi ta përkufizonte Kosovën me termin “Kosovë e Metohi”.

Gjatë këtyre ditëve, një e përditshme serbe publikoi një intervistë me presidentin serb, ku ai paralajmëronte se kishte hartuar një plan me katër pika për Kosovën, për zbatimin e të cilit do të kërkonte mbështetjen e fuqive të mëdha që kundërshtojnë pavarësinë.

Top Channel