Tadiç, “non grata” në Kosovë

Njëkohësisht Ministër i Drejtësisë, Kuçi tha nëpërmjet telefonit në një lidhje direkte televizive se autoritetet kosovare nuk do të lejojnë më hyrjen në vend të Tadiç.

”Prej shumë vitesh, vizitat e tij në Kosovë kanë qenë të ngarkuara me mesazhe politike të papranueshme dhe nuk do të lejojmë që kjo të ndodhë përsëri”, u deklaroi numri dy i qeverisë.

Përveçse e cilësoi Kosovën si “toka jonë”, Tadiç tha përpara serbëve të Kosovës se Beogradi nuk do ta njohë kurrë pavarësinë e Kosovës dhe se nuk ka ndërmend të tërheqë strukturat paralele, të konsideruara nga shteti serb si “të vetmet struktura të ligjshme”.

Vizita e vështirë e Tadiç

Manastiri i Deçanit edhe këtë here priti mysafirin e përvitshëm. Në Kosovë dhe Metohi, sic e quan ai, presidenti i Serbisë Boris Tadic bashkë me besimtarët ortodokse ndoqën ceremonine e liturgjisë së mëngjesit në Manastirin e Deçanit.

Edhe kësaj radhe ardhja e presidentit serb në Kosovë shkaktoi protesta në Dukagjin dhe me gjerë. Megjithëse vizita e presidentit serb ishte karakterizuar si një vizitë fetare edhe kësaj radhe ai përcolli mesazhe politike. Pas përfundimit të liturgjisë ai deklaroi edhe një herë se Serbia kurrë nuk do të njoh Kosovën.

Ai dënoi fuqishëm protestat në Pejë dhe Deçan ku vajtja e tij u prit me gurë dhe protesta dhe kur gazetarët e pyetën se a do ta njohë ndonjëherë pavarësinë e Kosovës, ai tha se përgjigjja e tij është shkurtër dhe e qartë: “Ju e dini përgjigjen time, ajo është e shkurtër dhe e qartë: kurrë!”.

Me këtë deklarata presidenti serb Tadic edhe njëherë shkeli mbi kushtet, në të cilat është lejuar që të hyjë në Kosovë.

“Këtu, në Deçan, mendoj se asgjë më tepër nuk mund të thuhet për shkak se ky manastir edhe është vend i shenjtë, jo vetëm për popullin tonë, por për të gjithë njerëzit që e vizitojnë Kosovën tonë, vendin tonë. Kjo është hapësira e jonë përbashkët europiane. Në Kosovë dhe Metohi, pa dallim etnie iu uroj të gjithëve Krishtlindjet. Nga ky vend i shenjte përcjell vetëm paqe”, tha Tadiç.

Për më tepër në natën e Krishtlindjeve ortodokse presidenti serb citohet të ketë bërë një deklaratë tipike politike madje edhe kërcënuese. Ai ka deklaruar për mediat serbe se kurrë nuk do t’i largojë institucionet paralele të Serbisë në Kosovë. Sipas tij, shumë shtete të fuqishme, anëtare të Këshillit të Sigurimit të OKB-së po bëjnë presion mbi Serbinë që të heqë institucionet nga Kosova, por kjo nuk do të ndodhë.

Në ceremoninë e liturgjisë në Manastirin e Deçanit përvec delegacionit serb morën pjesë edhe komandanti i KFOR-it, Erhard Dreës, shefi i EULEX-it Xavier Bout de Marnhac, përfaqësuesi i BE në Kosovë Ferdinando Gentilini, si dhe përfaqësuesit e trupit diplomatik, në mesin e cilëve edhe ambasadori amerikan Christopher Dell.

Top Channel