Massimiliano Allegri është shprehur se mes tij dhe sulmuesit brazilian Pato nuk ka asnjë problem.
“Mes nesh nuk ka probleme. Deklaratat e tij ishin një shfryrje normale. Shpresoj që të qëndrojë me ne, madje jam i sigurtë që do të qëndrojë”, u shpreh trajneri i Milanit nga Dubai, ku kuqezinjtë po zhvillojnë një minifazë përgatitore.
“Pato ka zhvilluar një stërvitje të mirë gjatë kësaj jave. Nuk ka asnjë problem përsa i përket dialogut mes nesh. Unë jam një person që nuk flet shumë, por kam folur me të aq sa kam folur me të tjerët. Mbase në periudhën e dëmtimit ai është ndjerë paksa i lënë mënjanë, por kur ka qenë në formë ka luajtur gjithmonë”, ka shtuar Allegri.
“Gjatë vitit nuk mund të luash të gjitha ndeshjet dhe fatkeqësisht Pato në 2 vitet e fundit ka pësuar shumë dëmtime”, theksoi tekniku italian.
Përsa i përket luftës për titullin kampion, Allegri u shpreh: “Juventusi është një ekip i madh, por nuk kemi frikë. I kemi mundësitë për të fituar përsëri.”
Top Channel
