Varfëria largon festat

Manuela kujton se shumë herë është shtrirë të flejë pa ngrënë asgjë për të gjithë diten. Vajza banon në një shtëpi gati të rënuar me familjen e saj dhe me gjashtë persona.

”Dua të luaj këtë Vit të Ri me lodra. Nuk kam patur asnjëherë ndonjë kukull”, shprehet e mitura.

Babai i saj, Dalip Hyka, këtë vit nuk ka asnjë mundësi që t’i sigurojë familjes së tij të festojnë sot Vitin e Ri. Varfëria ekstreme ka pushtuar familjen e Dalip Hykës në fshatin Godolesh të Elbasanit.

”Shtëpia nuk ka asnjë gjë. As lavoman, as lavatriçe, as frigorifer, asnjë gjë. Vetëm një televizor kam në shtëpi, edhe atë ma ka dhuruar vëllai që më përpara. Jetojmë aq keq sa nuk ka më ku të vejë. Me asistencë 40 mijë lekëshe, me atë jetojmë. Jemi gjashtë veta në shtëpi. Si ia dal për të siguruar ushqimin? Me vuajtje. Kur s’kemi rimë pa ngrënë. Ka patur edhe raste të tilla.”

Zonja e shtëpisë, Drita, shprehet se gjendja është vërtetë kritike. Ajo kërkon një ndihmë për fëmijet e saj.

”Na ka rënë kjo fatkeqësi dhe nuk dimë se çfarë të bëjmë. Ne nuk e festojmë dot Vitin e Ri”, thotë ajo.

Shtëpia e tyre po rrënohet prej amortizimit dhe jetesa në këtë gërmadhe bëhet akoma më e vështirë në këto ditë të forta dimri.

Sot, kur të gjithe do festojnë ditën e ndërimit të viteve, fëmijët e Dalip dhe Drita Hykes do të flenë sërish të pangrëne në banesën ku zot shtëpie është varfëria.

Top Channel