Greqi, zgjedhjet parlamentare pas marsit

Lajmin e ka bërë të ditur zëdhënësi i qeverisë, Pantelis Kapsis, sipas të cilit para zgjedhjeve do të pritet edhe aprovimi i planit të ndihmave ekonomike në samitin evropian.

“Për datën nuk mund të jemi absolutisht të saktë. Është e qartë që bisedimet do të zgjasin deri në mars. Nga fundi i marsit do të hyjmë në periudhë paraelektorale, por deri kur do të zgjasë ajo nuk e di”, ka deklaruar zëdhënësi.

Greqia vazhdon të jetë e zhytur në krizën ekonomike, që ka bërë që cdo ditë e më tepër të shtohet numri i grekëve që vendosin të emigrojnë jashtë vendit, në kërkim të një të ardhmeje më të mirë e më të sigurt.

Gjithashtu, edhe qeveria greke ndodhet në vështirësi pasi grekëve u pëlqen kryeministri i ri Lukas Papadhimos, por ata janë mosbesues ndaj ekzekutivit të unitetit kombëtar, të formuar nga politikanë të PASOK-ut, Demokracisë së Re dhe Laos-it.

Vetë Papadhimos bëri më herët gjatë muajit bilancin e 30 ditëve të qeverisë së tij, të cilin e cilësoi si pozitiv, duke deklaruar se janë realizuar dy synime kryesore, sic janë lëvrimi i këstit të gjashtë të ndihmës dhe aprovimi me shumicë votash në parlament i buxhtetit të vitit 2012.

Top Channel