Protestat kundër Putinit

Zemërim ndaj manipulimit të zgjedhjeve dhe thirrje për largimin e Vladimir Putin, kjo ishte ajo cfarë përcolli grumbullimi gjigand.

“Kemi aq shumë njerëz këtu sa për të sulmuar Kremlinin dhe selinë e qeverisë, por për momentin nuk e bëjmë, por nëse këta hajdutë do të vazhdojnë të na mashtrojnë, do të kalojmë në veprim. Nuk mund të tolerojmë pafundësisht”, tha përpara turmës së njerëzve Alexei Navalni, bloggeri më i famshëm rus anti-Putinit.

Policia flet për 29.000 pjesëmarrës në protestë, por organizatorët e vendosin këtë shifër në 120.000. Arma e përdorur prej tyre ishte ironia kundër Putinit. Tubuesit kaluan një “rezolutë” për të mos i dhënë kryeministrit as edhe një votë të vetme në zgjedhjet presidenciale të vitit që vjen.

Një zëdhënës i Putinit tha për BBC-në se kryeministri gëzon mbështetjen e shumicës së popullsisë, dhe protestuesit i përshkroi si pakicë.

Dimitri Peskov u shfaq në intervistë mëse i bindur se kreu i ekzekutivit do t’i fitojë zgjedhjet presidenciale të muajit mars, ku sipas tij, qëndron më lart se cdo konkurent tjetër. Por lumi i njerëzve që vërshuan në rrugën Sakharov, jo shumë larg Kremlinit në temperaturë nën zero, sfidon besimin e palëkundur të Putinit dhe njerëzve të tij në fitore.

Protesta të ngjashme janë mbajtur në mbarë Rusinë, më e madhja në Vladivostok.

Presidenti, Dimitri Medvedev njoftoi këtë javë vendimin për reforma politike, por demonstruesit thonë se nisma e tij nuk është e mjaftueshme dhe kërkoi përsëritjen e zgjedhjeve.

Top Channel