Filipine, stuhia tropikale vret 189 persona
17/12/2011 08:35
Modelja e rrjetit dënohet 10 vjet për komplotin e vrasjes me pagesë të rivaleve (fotot) 25/11 17:42
Një stuhi tropikale ka vrarë të paktën 189 persona në Filipine, duke sjellë përmbytje dhe duke shkaktuar zhdukjen e shumë personave të tjerë.
Lajmin e komunikojnë autoritetet lokale, sipas të cilave shumica e viktimave janë nga ishulli jugor i Mindanaos, përreth Qytetit Iligan dhe Kagajan de Oro.
Dhjetra mijëra persona janë larguar për në zona më të larta të vendit, nënvizojnë autoritetet, të cilat janë të alarmuara nga situata e rëndë.
Benito Ramos, drejtues i Agjencisë për përballimin e emergjencave kombëtare tha se lajmet janë ende në ardhje dhe se numri i viktimave mund të rritet.
Zoti Ramos deklaroi gjithashtu se niveli i përmbytjeve është rritur në mënyrë alarmante gjatë natës, teksa njerëzit ishin duke fjetur.
“Përmbytje masive janë raportuar në të gjithë rajonin, sidomos në Qytetin Iligan dhe Kagajan de Oro”, tha zyrtari i lartë, duke shtuar se lumenjtë kanë dalë nga shtrati i tyre pasi 25 milimetra shi ra në 24 orë.
Zona të gjera kanë mbetur pa energji elektrike dhe disa fluturime të brendshme janë pezulluar për shkak të erës që fryn më 90 kilometra në orë në të gjithë ishullin.
Një zëdhënës ushtarak, koloneli Leopoldo Galon deklaroi se një divizion i tërë ushtarak, me rreth 10 mijë ushtarë, është angazhuar në operacionet e shpëtimit.
Trupat e pajetë të rreth 100 personave, shumica e të cilëve fëmijë, u gjetën në Kagajan de Oro, ndërkohë që një rrëshqitje toke në lindje të ishullit vrau të paktën pesë persona.
Top Channel
