Të paktën 102 persona raportohet se kanë vdekur pasi kanë konsumuar alkool toksik në shtetin e Bengalit Perëndimor, në Indi.
Banorët e 12 fshatrave në rajonin jugor të Parganasit u ndjenë keq pasi kishin pirë alkoolin. Policia ka arrestuar katër persona lidhur me ngjarjen.
Rreth 70 persona të tjerë po trajtohen në spital, me frikën se numri i viktimave mund të rritet. Shumë nga personat humbën jetën në shtëpitë e tyre, me frikën se policia do të ndërmerrte një aksion ndaj tyre.
Vdekjet nga alkooli toksik janë dicka normale në Indi. Javën e kaluar, shteti i Guxharatit propozoi një ligj të ri që e ndëshkon prodhimin dhe shitjen e këtij lloji alkooli me vdekje.
Fshatrat e prekura janë në rajonet Sangrampur, Magrahat, Usthi dhe Mandirbazar. Fshatarët e konsumuan alkoolin të martën pasdite dhe pavarësisht se u ndjenë keq, qëndruan në shtëpitë e tyre nga frika e reagimit të policisë, raporton korrespondentja e BBC në Kalkuta, Amitabha Bhattashali.
Nga e enjtja në mëngjes, një numër i madh personash, përfshirë dy fëmijë, janë shtruar në spitalet në zonën përreth qytetit të Kalkutës, me simptoma të helmimit nga alkooli.
Ndërkohë, ministri i Shëndetësisë, Shyamal Mandal ka deklaruar për BBC se rreth 70 persona ndodhen në gjendje kritike.
Alkooli toksik është i ambalazhuar në kanoce dhe shpërndahet në të gjitha rajonet e Indisë, në autobusë dhe trena. Shitësit e pakicës e shesin gjithashtu me qese plastike.
Alkooli ilegal zakonisht kushton vetëm 10 rupi, sic njihet valuta lokale, ose 20 cent amerikanë, dhe konsumatorët e tij janë shtresat e varfëra.
Top Channel
