Rusi, protesta më e madhe që nga rënia e BS

Rreth 50 mijë persona janë mbledhur në një zonë në afërsi të Kremlinit për të dënuar mashtrimin elektoral në zgjedhjet parlamentare dhe për të kërkuar përsëritjen e tyre.

Manifestime të tjera, por më të vogla, janë zhvilluar edhe në qytete të tjera si për shembull në Shën Pietërburg. Komunistë, nacionalistë dhe pro-perëndimorë u mblodhën së bashku, pavarësisht ndarjeve politike.

Protestuesit pretendojnë se ka pasur shkelje të mëdha në zgjedhjet e së dielës, ku partia në pushtet Rusia e Bashkuar fitoi me një rënie drastike të elektoratit të saj.

Protestat e zhvilluara menjëherë pas zgjedhjeve u shoqëruan me mbi 1 mijë të arrestuar, shumica e të cilëve në Moskë. Mes tyre kishte edhe figura të rëndësishme si tribuni i luftës kundër korrupsionit, Alexei Navalny, i cili ndodhet në burgim.

Kryeministri Vladimir Putin nuk është përballur kurrë më parë me protesta kaq të mëdha, deklaron korrespondenti i BBC në Moskë, Steve Rosenberg.

Gjatë dekadës së tij në pushtet, fillimisht si president dhe më pas si kryeministër, ai është konsideruar si politikani më popullor dhe më i pushtetshëm në Rusi.

Por, sic ka thënë një protestues për rrjetin informativ britanik, Rusia tani ka hyrë në rrugën e ndryshimit dhe Putin nuk është më një figurë e përshtatshme për vendin.

Pak ditë më parë, Putin akuzoi Shtetet e Bashkuara si orkestruese të protestave post-zgjedhore në Rusi, duke e vënë theksin tek një deklaratë e sekretares së Shtetit, Hillary Clinton.

Gjithashtu, ai refuzoi të pranonte se partia e tij ishte më e humbura nga zgjedhjet e ditës së dielë dhe i cilësoi si të zakonshme luhatjet në votime.

Ndërsa ish-presidenti sovjetik, Mikail Gorbachev, iu bashkua kritikëve të zgjedhjeve parlamentare në Rusi, duke thënë se votimet e së dielës u karakterizuan nga manipulime të mëdha.

Top Channel