Itali, skandali me plehrat

E ndërkohë, Bashkimi Europian i ka dhënë vetëm dy muaj kohë përpara se të aplikojë sanskionet për Napolin, qyteti ku problemi i plehrave mbetet një plagë e vërtetë.

Përpara pak ditësh Rai transmetoi investigimin e gazetarit Emilio Casalini, i cili ka ndjekur rrugëtimin e paligjshëm të mbeturinave të rrezikshme nga Italia në Kinë, duke u hequr si trafikant.

Meqenëse ka punuar gjatë në këtë fushë, që tanimë e njeh mirë, e takuam në studion e tij për t’i kërkuar një mendim mbi importin e legalizuar të mbeturinave në Shqipëri.

“Unë nuk e njoh me detaje ligjin, por vetëm koncepti i importimit të mbeturinave mua më duket çmenduri. Cdo vend prodhon sasi të mëdha mbeturinash, i prodhojmë ne e i prodhoni edhe ju në Shqipëri. Keni frigorifere, kompjutera, materiale toksike, mbetje nga përpunimet e ndryshme. Këto mbeturina, e kam fjalën për mbeturinat e rrezikshme, prodhohen në çdo vend dhe duhen përpunuar e menaxhuar në vendin përkatës”, deklaron Casalini.

“T’i hapësh derën importimit të ligjshëm të mbeturinave më duket e pakonceptueshme. Të importosh, për të bërë çfarë? Unë si italian e shtroj pyetjen: çfarë impiantesh ka atje? Cfarë lloj çertifikatash kanë impiantet? Ç’garanci ka mbi impaktin që sjellin në mjedis e që mbeturinat trajtohen sipas rregullave? Deri sa këto pyetje nuk kanë një përgjigje të qartë edhe eksportimi nga Italia për shembull, nuk do të ishte i paligjshëm edhe nëse importi është i ligjshëm. E në këtë mënyrë është e qartë që u hapen më shumë mundësi atyre që duan ta bëjnë këtë në mënyrë të paligjshme”, thekson Casalini.

Emilio Casalini po niset për realizimin e një tjetër etape të investigimit të tij që ka marrë emrin “Spazzatour-Tour-i i Pleherave”. Mbeten në mend fjalët e tij: “As që mund ta imagjinoj përse është aprovuar një ligj i tillë”.

Top Channel