Eurozonë, Ministrat e Financave debatojnë për krizën

Gjithashtu, pritet të diskutohet huaja shtesë që Greqia ka kërkuar. Liderat europianë shpresojnë në arritjen e një marrëveshje për të rritur fondin e “stabilitetit” në një trilion euro.

Rritja e fondit aktual prej 440 miliardë eurosh shihet si shumë i rëndësishëm nga investitorët për të luftuar krizën e borxheve. Një prej mënyrave për të rritur këtë fond, besohet se do të jetë joshja e investitorëve nëpërmjet interesave të lartë mbi bonot shtetërore të thesarit.

Ndërsa hua madhore janë akorduar për Greqinë, Portugalinë dhe Irlandën, Europa do të gjendej përballë një krize shumë më serioze nëse dy ekonomi shumë më të mëdha si Italia dhe Spanja do të kalonin në kolaps.

Frika se Italia mund të ketë nevojë për asistencë financiare, u rrit edhe më shumë të martën, falë një shtrenjtimi rekord në interesat për huamarrjen. Në emetimin e letrave 10-vjeçare me vlerë, Roma pagoi interesa prej 7,6%, nga vetëm 6,1% që kishte paguar një muaj më parë. Kjo është një shenjë e qartë e besimit gjithmonë në rënie të investitorëve ndaj autoriteteve italiane.

Takimi i Ministrave të Financave vjen një ditë pasi presidenti amerikan, Barack Obama, u takua me liderat me të lartë të Bashkimit Europian, për të biseduar rreth krizës së borxheve. Në një deklaratë mbështetëse, ai u shpreh se “SHBA nuk do të lërë të vetme Europën në këtë moment të vështirë”.

Top Channel