Shqipëria drejt limitit të borxhit

Dy ditë më parë fondi monetar deklaroi se rritja ekonomike e shqipërisë këtë vit do të jetë vetëm 2 për qind.

Nëse ky skenar vërtetohet, borxhi i Shqipërisë në fund të vitit e kalon automatikisht kufirin ligjor prej 60 për qind. Kjo pavarësisht shkurtimit masiv të shpenzimeve, që qeveria po bën për të ndalur rritjen e tij.

E thënë ndryshe edhe pse qeveria po shkurton fort fondet për investimet apo zëra të tjerë shpenzimesh, sërish nuk nuk mund ta ndalë dot rritjen e borxhit nëse ekonomia rritet ngadalë. Kjo pasi ecuria e borxhit publik përcaktohet nga tre faktorë, që janë normat e interesit që qeveria paguan për të, deficiti buxhetor, ose borxhi i ri që ajo merr për cdo vit dhe rritja ekonomike.

Nëse dy të parat kanë efekt negativ dhe e rrisin borxhin, rritja ekonomike shërben si kundërpeshë që e ul atë. Por në kushtet kur ekonomia rritet më ngadalë, borxhi bëhet i vështirë për t’u ulur dhe madje vazhdon të rritet.

Këtë vit, deficiti buxhetor pritet të jetë në nivelet më të ulëta historike, 3 për qind e prodhimit kombëtar. Nëse rritja ekonomike do të ishte si para krizës, në nivelet 6 për qind borxhi i vendit jo vetëm që nuk do të rritej krahasuar me 2010-ën, por përkundrazi do të ulej poshtë nivelit 57 për qind. Por kur rritja ekonomike tkurret në 2 për qind sic thotë FMN, me të njëtin nivel deficiti, borxhi kërcën mbi kufirin 60 për qind.

Edhe pse kalimi i këtij kufiri është një sinjal negativ që Shqipëria përcjell në tregjet financiare vendase dhe të huaja, sërish ai nuk është problemi më i madh për financat e vendit. Pasi nuk ka ndonjë diferencë nëse borxhi është 60.1 apo 59.5 për qind.

Shqetësimi real i financave tani është se tkurrja e rritjes ekonomike e ka prangosur Shqipërinë në nivele të larta borxhi dhe e bën të pamundur uljen e tij, duke qenë një burim jo i vogël rreziku për qëndrueshmërinë financiare të vendit.   

Top Channel