Kaka’, mesfushori i Real Madrid, është shprehur për një televizion brazilian se Cristiano Ronaldo dhe Messi janë futbollistët më të mirë në botë, por portugezi është më i kompletuar se argjentinasi i Barcelonës.
“Nuk mund të them se kush është futbollisti më i mirë në botë sepse është relative dhe shumë varet nga ajo që bën me ekipin ku luan. Individualisht ata janë dy lojtarët më të mirë, por mendoj se Cristiano është më i mirë. Është më i kompletuar sepse bën gola me të djathtën, të majtën, me kokë dhe me goditje dënimi”, u shpreh braziliani duke lavdëruar shokun e tij të ekipit tek Real.
Kur u pyet se pse u largua nga Milani, Kaka’ theksoi se kuqezinjtë për herë të parë po mendonin të shisnin për të mbushur arkën e klubit.
“Mendova se aventura me Milanin kishte përfunduar. Në të gjithë historinë e tij, Milani nuk kishte shitur kurrë një lojtar për të marrë para dhe kur erdhi oferta e Manchester City, drejtuesit e menduan seriozisht. Në këtë moment edhe unë fillova të mendoj se Milani ishte i gatshëm të më largonte. Nëse duhej të largohesha nga Milani doja të luaja vetëm për Real Madrid dhe për asnjë klub tjetër”, u shpreh Kaka’.
Top Channel
