Papadhimos kryeministri i ri i Greqisë

08/11/2011 00:00

Lukas Papadhimos është emri i kryeministrit të qeverisë së re të unitetit kombëtar për krijimin e së cilës kanë rënë dakord dy partitë e mëdha rivale, PASOK dhe Demokracia e Re në Greqi përgjatë negociatave që kanë zgjatur gati tre ditë.

Lajmin e bëjnë të ditur media greke, por edhe të huaja, të cilat u referohen burimeve nga zyra e presidentit Papulias si dhe një zyrtari të lartë qeveritar, por ende nuk ka një komunikim zyrtar.

Shkaku i vonesës së publikimit të emrit të tij ka qenë fakti se konservatorët dhe socialistët kishin mendime të ndryshme për përbërjen e qeverisë së re.

Kryeministri aktual Jorgos Papandreu, në një mbledhje të fundit të kabinetit, u ka kërkuar ministrave të tij, të kenë gati dorëheqjen e tyre, për t’i hapur rrugë ashtu sic parashikon Kushtetuta, krijimit të qeverisë së unitetit kombëtar.

Ish zv/presidenti i BQE, Lukas Papadhimos, ka pranuar të jetë në krye të kësaj skeme qeveritare, qëllimi kryesor i së cilës është të bëjë gjithcka është e mundur për lëvrimin e këstit të 6 të ndihmës brenda muajit nëntor, dorëzimit të project-buxhetit të vitit 2012 në parlament dhe nënshkrimit të memorandumit të ndihmës në samitin e BE në 26 tetor për Greqinë.

Sipas rrugës konstitucionale, parashikohet dorëheqja e kryeministrit Papandreu para presidentit dhe më pas ndiqet gjithë procedura ligjore për krijimin e qeverisë së re që do të votohet me shumicë votash nga parlamenti. Në një zhvillim të fundit ultranacionalistët kanë deklaruar se nuk do të marrin pjesë në qeverinë e re.

Përfaqësues të dy partive shprehin mosbesimin se qeveria e re nuk do të jetë në gjendje për shumë kohë të jetë rezultative, sepse baza mbi të cilin është krijuar nuk është aspak e qendrueshme.

Nga ana tjetër krijimi i saj do të qetësojë tregjet, partnerët europianë dhe do i hapë rrugën zgjidhjes se krizës politike në Greqi, në mënyrë që të fillojë zbatimi i reformave deri në zgjedhjet e reja parlamentare që flitet se do të jenë në muajin shkurt.