Samaras: Papandreu të ikë

or Samaras ka këmbëngulur se kushti kryesor për fillimin e menjëhershëm  të negociatave dy palëshe për skemën qeveritare, është dorëheqja e kryeminsitrit aktual.

Nga ana e tyre socialistët thonë se Papandreu ka deklaruar më shumë se tre herë që do të japë dorëheqjen, sapo të gjendet gjuha e përbashkët midis dy partive rivalë dhe të kenë rënë dakord për personat që do të përbëjnë qeverinë e re.

Por në vend po shtohen shumë zërat së duke parë udhëkryqin politik Jorgos Papandreu do t’u hapë rrugën zhvillimeve politike dhe do të japë dorëheqjen në orët e ardhshme.

Edhe dje në takimin e tij me presidentin grek ai ka ripërsëritur se është i hapur për krijimin e një qeverie uniteti qëllimi i së cilës është ratifikimi deri në fund të vitit i planit për reduktimin e borxhit të miratuar nga samiti i BE në 26 tetor që do shpëtojë vendin nga falimentimi, duke mos lejuar daljen e Athinës nga Eurozona.

Sipas mediave vendase, socialistët dhe konservatorët po hedhin topin sa nga njëra fushë në tjetrën, duke u përpjekur që secila palë të mos pësojë gol.  Gazeta Kathimerini e së dielës i karakterizon këto bisedime të dy partive rivale si pazare politike mbi Titanikun.

Ndërkohë dy sondazhe të gazetave të së dielës Proto Thema dhe Ethnos tregojnë se më shumë se gjysma e grekëve janë pro një qeverie të unitetit kombëtar, por edhe një numër i konsiderueshëm preferojnë zgjedhjet e parakohëshme.

Shumica e qytetarëve, 79%, konsiderojnë gabim të madh kërkesën e Papandreut për referendum/ Megjithëse vetëm 22% e të intervistuarve votojnë për Demokracinë e Re, të djathtë kryesojnë me 7.5% ndaj Pasokut.

Udhëheqësit europianë i kanë bërë të qartë si socialistëve që udhëheqin ashtu edhe opozitarëve konservatore se nuk mund të luajnë më me fatet e vendit dhe se nëse kërkojnë të jenë pjesë e Eurozonës, duhet të gjejnë urgjent gjuhën e përbashkët dhe t’i japin fund krizës politike.

Top Channel