Vetëvendosje, protestë në Prishtinë

Duke mbajtur në duar parulla të llojeve të ndryshme, aktivistët kanë ironizuar qeverinë për gjendjen aktuale në të cilën ndodhet Kosova.

“Kosova është radhitur e para mes shteteve më demokratike në botë. Urra! Më 1 nëntor, ashtu sic premtoi Edita Tahiri, strukturat paralele serbe në Kosovë u shpërbënë. Kushdo që është i interesuar mund të pijë kafe me ministrin Bajram Rexhepi në cdo zonë të veriut. Në vitin 2012 buxheti i Kosovës do të dhjetëfishohet”, kanë bërtitur aktivistët.

Më pas ata kanë vendosur hudhra në oborrin e selisë së qeverisë, në mënyrë simbolike për të mos marrë mësysh arritjet e saj.

“Në shenjë simbolike po vendosim hudhra tek ndërtesa e qeverisë, që atë të mos e marrë mësysh askush, sepse është shumë e mirë. Urra!”, kanë bërtitur aktivistët.

Një protestë të ngjashme lëvizja Vetëvendosje organizoi edhe muajin e kaluar, ku në shënjtestër të aksionit ishte Ministria e Brendshme e Kosovës.

Aktivistët vendosën në rrethinat e godinës së ministrisë një objekt të cilin e quajtën “hajmali”, për të parodizuar disa deklarata të ministrit Bajram Rexhepi lidhur me situatën në veri.

Top Channel