“Sokol Balla Live”, është ky emisioni radiofonik i njërit prej emrave më në zë të gazetarisë vendase, i cili përpos “Top Story” në Top Channel do jetë në transmetim çdo të mërkurë nga ora 12.00-14.00 në Top Albania Radio, për të trajtuar ndryshe tema nga të gjitha gjinitë e informacionit.
“Radioja nuk është gjë e re për mua sepse unë kam kaluar shumë vite në radio. Besoj se është një trend i gazetarëve të njohur që përveç televizionit kanë një impenjim të dytë në radio, ku ka një tjetër sharm, ngrohtësi dhe liri në krahasim e televizionin. Gjithashtu në radio je më i lirë për të dhënë edhe mendimet e tua”, shprehet Balla.
Janë tre tematikat që trajtohen në çdo emision, me të ftuar në studio dhe lidhje direkte telefonike: Kronikë, politikë dhe sociale.
Nuk do të mungojnë edhe tematikat kulturore, sportive e nga bota, si dhe përcjellje satirike të 10 lajmeve më të spikatura të javës.
“Sokol Balla Live”, një emision i thellimit gazetaresk, por më afër publikut.
“Radio të ofron diçka që televizioni nuk ta ofron dot: ngrohtësinë. Në television je me kostum, ndërsa ka pasur raste që emisionin e radios e kam bërë me xhinse dhe atlete. Radio të çliron nga uniformat televizive”, shton Sokol Balla.
Top Channel
