Thaci: S’jemi në luftë me banorët e veriut

“Mes qeverisë dhe qytetarëve në veri të vendit nuk ka konflikt. Ata janë qytetarë të Kosovës dhe unë jam në shërbim të tyre”, ka deklaruar Thaci.

Deklaratën e tij, kryeministri e ka bërë në një intervistë për të përditshmen zvicerane “Neue Zeitung”.

Thaci ka nënvizuar se situata në veri është e qetë por komplekse dhe ka shtuar se atje nuk bëhet fjalë për cështje politike, por për rend dhe ligj.

Thaci: Në konflikt me ata që shkelin ligjin

Të njëjtin mesazh Thaci dha edhe dy ditë më parë në Kuvendin e Kosovës, ku deklaroi se veprimet kriminale në veri janë mbështetur nga shteti serb.

I thirrur në interpelancë për cështjen e veriut nga lëvizja Vetëvendosje, Thaci theksoi se situata në këtë pjesë të Kosovës është e trashëguar.

“Eshtë investuar ndjeshëm për infrastrukturën në veri. Strategjia për veriun ishte një përkushtim i qeverisë”, tha Thaci.

Duke folur për bllokimin e hyrjes së mallrave serbë në Kosovë, dhe më pas për aksionin në këtë zonë, Thaci theksoi se gjendja e krijuar ka patur ndikime negative.

“Gjendja ndikon keq për zhvillimin e qytetarëve të Kosovës. 40 mijë qytetarë serbë janë bërë pre dhe instrument i strukturave politike të Beogradit. Masat e ndërmarra në veri nuk i drejtohen asnjë qytetari të Kosovës. Qeveria e Kosovës nuk është në konflikt me qytetarët në veri, por me ata që po pengojnë zhvillimin”, tha Thaci, duke paralajmëruar se përgjegjësit do të përballen me drejtësinë.

Kryeministri i Kosovës theksoi se barrikadat e vendosura në veri të Mitrovicës nuk do të qëndrojnë shumë gjatë, sepse ligji dhe rendi do të funksionojë në të gjithë territorin e vendit, por nuk tha një datë të saktë se kur do të largohen bllokadat.

Top Channel