Pesë militantë palestinezë janë vrarë nga një seri sulmesh ajrore izraelite në jug të Rripit të Gazës.
Aktet e dhunës janë më të rëndat që pas marrëveshjes për shkëmbimin e të burgosurve më herët gjatë muajit.
Militantët janë vrarë në një zonë që përdorej për stërvitjen e kadetëve të Xhihadit Islamik në Rafah, në jug të Rripit të Gazës.
Forcat ajrore izraelite kanë konfirmuar autorësinë e sulmit, duke deklaruar se e ndërmorën pasi militantët po përgatiteshin të kryenin një sulm me raketa në Izrael.
Një zëdhënës i ushtrisë izraelite ka deklaruar për agjencinë e lajmeve “AFP” se avioni ka sulmuar edhe zona të tjera.
“Ushtria izraelite ka sulmuar tre baza terroriste në Rripin e Gazës, si dhe një fabrikë armësh në jug të territorit”, ka deklaruar zëdhënësi.
Një nga objektivat raportohet se i përkiste lëvizjes islamike të Hamas, tek e cila aderon në mënyrë indirekte edhe grupi militant Xhihadi Islamik.
Aktet e dhunës vijnë në më pak se dy javë nga lirimi i rreshterit izraelit Gilad Shalit në këmbim të lirimit të 500 të burgosurve palestinezë nga Izraeli.
Grupi militant që u godit nga sulmet e sotme ka bërë të ditur përmes një komunikate për shtyp se do të reagojë ndaj tij.
Top Channel
