Për çfarë protestojnë grekët?

Plani pesë-vjeçar do të lejojë grumbullimin e më shumë të ardhruave nga taksat, ndërsa dhjetëra milionë të tjerë do të kursehen nga investimet shtetërore, fondi i pagave e pensioneve dhe shkurtimet. Por, çfarë përmban në tërësi plani ndaj të cilit grekët protestojnë me kaq vendosmëri?

Tatimet
– Taksat do të rriten me 2,32 miliardë euro në vitin aktual, për të vazhduar rritjen me 3,38 miliardë euro, 152 dhe 699 milion, në vitet që do të pasojnë.
– Një taksë shtesë “solidariteti”, me vlerë 1-5% të të ardhurave familjare, do të paguhet dy herë në vit nga çdo familje.
– Ndërsa aktualisht personat me të ardhura nën 12 mijë euro nuk paguajnë taksa mbi fitimet, kufiri ulet në 5 mijë euro e poshtë.
– Rritet TVSH-ja, nga 19 në 23%. Rritje edhe për produktet që paguajnë më pak TVSH, nga 11 do të bëhet 13% dhe nga 5,5 në 6,5%.
– Taksa të reja shtesë për të gjithë mallrat e konsideruara si luksi, përfshi cigaret, alkoolin, karburantet, mjetet e shtrenjta të transportit dhe shtëpitë e dyta.
– Hiqen disa përjashtime nga taksat.

Shkurtimet në sektorin publik
– Fondi i pagave reduktohet me dy miliardë euro deri në 2015-n.
– Të gjitha pagat reduktohet me 20% në administratë.
– Të gjitha pagat e kompanive shtetërore reduktohen me 30%, ndërsa hiqen pagat shtesë në fundviti dhe të gjithë bonuset e tjerë.
– 30 mijë persona do të humbasin vendin e punës. Për një vit do të dalin në asistencë me 60% të rrogës, për të mbetur të papunë vitin e ardhshëm, ndonëse kanë statusin e nënpunësit civil, që detyron shtetin t’i punësojë në çdo rast.
– Të gjitha kontratat me punë të përkohshme prishen.
– Vetëm 1 në 10 punonjës i administratës që del në pension do të zëvendësohet për dy vjet, vetëm 1 në 5 në vazhdim.

Shkurtimet e shpenzimeve
– Shpenzimet për mbrojtjen reduktohen me 200 milion euro në 2012-n dhe me 333 milion çdo vit nga 2013-2015.
– Shpenzimet në shëndetësi reduktohen me 310 milion euro që sivjet dhe një total prej 1,81 miliardë eurosh në periudhën 2012-15.
– Investimet publike reduktohen me 850 milion euro në 2011-n.
– Subvencionet për pushtetin vendor reduktohen.
– Shpenzimet për edukimin do të reduktohen duke mbyllur ose bashkuar 1 976 shkolla.

Shkurtimet e përfitimeve
– Sigurimet shoqërore reduktohen me 1,09 miliardë euro dhe me më shumë se 1 miliadë në katër vitet e ardhshme.
– Pensionet mbi 1 mijë euro shkurtohen me 20%.
– Pensionistët aktualë nën 55 vjeç humbin 40% të pensioneve mbi 1 mijë euro.
– Aksion për reduktimin e evazionit fiskal, duke detyruar firmat të deklarojnë saktësisht numrin e punonjësve dhe pagën e tyre.
– Rritet mosha e daljes në pension në 65 vjeç, ndërsa për të përfituar pension duhen 40 vjet punë.

Privatizimet
– Synohet të grumbullohen 50 miliardë euro nga privatizimet deri në 2015-n, përfshi: Shitja e aksioneve të monopolit shtetëror të basteve “OPAP”, shitja e Postës Greke, operatorëve të portit të Pireut, porti dhe ujrat detarë të Selanikut.
– Shitja e 10% të “Hellenic Telecom” tek “Deutsche Telecom” për 400 milion euro.
– Duke nisur nga 2012-ta, privatizimi i ujësjellësit të Athinës, rafinerisë së naftës së vetme në vend, kompanisë së dritave “PPC”, e disa bankave kryesore, porteve, airoporteve, dhënia me koncension e autostradave dhe të drejtave minerare.
– Planifikohen shitje të mëtejshme që do të krijojnë 7 miliardë euro në 2013-n, 13 miliardë në 2014-n dhe 15 miliardë në 2015-n.

Reforma në treg
– Një ligj i ri do ta bëjë më të lehtë për kompanitë që të shkarkojnë nga puna punonjsit e tyre. Kjo do të bëhet duke pezulluar shumë ligje që industrive iu janë imponuar prej sindikatave.

Top Channel