Thaci: Dialogu për vizat, sukses i Kosovës

“Është një lajm i mirë, sukses i shtetit të ri të Kosovës dhe konkretisht fillimi i perspektivës evropiane me hapa konkretë”, deklaroi Thaci.

“Kjo është meritë e vizionit tonë evropian për ndërtimin e Kosovës së re, demokratike dhe evropiane”, tha Thaci në mbledhjen e qeverisë.

Kryeministri u zotua për përmbushjen e shpejtë të kushteve për heqjen e regjimit të vizave për Kosovën, i vetmi vend në Ballkan për të cilin vlen ky regjim.

“Qeveria është e vendosur që të vazhdojë edhe më fuqishëm përmbushjen në një kohë rekord të të gjitha parakushteve në kuadër të procesit të liberalizimit të vizave”, tha kreu i ekzekutivit kosovar.

Ai u zotua edhe për adresimin e sfidave që dalin nga raport-progresi, si reforma zgjedhore apo sundimi i ligjit.

Më tej Thaci bëri të ditur se brenda vitit do të themelohet një Këshill Kombëtar për Integrime Evropiane, i cili do të hartojë një strategji afatgjatë për proceset integruese.

Sipas progres-raportit të Komisionit Evropian, bisedimet mes Brukselit dhe Prishtinës për liberalizimin e vizave me vendet e BE do të nisin nga fundi i vitit.

Top Channel