Kacin: Serbia të rikthehet në bisedime

“Ai që është larguar nga bisedimet duhet të kthehet sa më parë. Komisioni Evropian më 12 tetor do të lëshojë rekomandimin, i cili do të dështojë nëse Serbia, me veprimet që po ndodhin aktualisht, tregon se nuk i intereson statusi i vendit kandidat”, ka deklaruar Kacin.

Europarlamentari ka nënvizuar se zgjidhja e situatës në Kosovë është në interes të Serbisë, e cila sipas tij nuk i ka të qarta prioritetet e saj.

“Statusi i kandidatit është në pëllëmbë të dorës, por prioritetet e Serbisë duket se janë të tjera”, ka nënvizuar Kacin.

Raportuesi i Parlamentit Evropian ka shprehur besimin tek institucionet ndërkombëtare që po veprojnë në veri të Kosovës.

“Të gjitha vendimet dhe veprimet e KFOR-it dhe EULEX-it janë transparente”, ka shtuar ai, duke shprehur mbështetjen e Parlamentit Evropian.

Bisedimet Prishtinë-Beograd, të parashikuara për në datat 27 dhe 28 shtator, dështuan pasi pala serbe nuk arriti të impononte temat e bisedimeve.

Për caktimin e një raundi të ri dialogu, negociatori i Bashkimit Evropian, Robert Cooper do të zhvillojë së shpejti vizita në Serbi dhe Kosovë.

Top Channel