Stefanovic, takim me ndërkombëtarët

Lajmin e bëjnë të ditur mediat serbe, sipas të cilave Brukseli ka pranuar kërkesën e bërë nga Beogradi, i cili e kishte parashtruar edhe si kusht për bisedimet me Prishtinën.

Sipas burimeve, zyrtari serb do të takohet me ndërmjetësin e BE, Robert Cooper dhe zyrtarin e Departamentit të Shtetit, Philip Reeker, me të cilët do të diskutojë mbi cështjen e pikave kufitare të Bërnjakut dhe Jarinjës.

Raundi i ri i dialogut Prishtinë-Beograd është parashikuar të mbahet në datat 27 dhe 28 shtator, sikurse herët e tjera në Bruksel.

Negociatorja kosovare, Edita Tahiri deklaroi të premten se mes temave që do të trajtohen këtë herë do të jenë edhe telekomunikacioni e energjia. Megjithatë, Tahiri theksoi se do të preket edhe vonesa e zbatimit të pesë marrëveshjeve të arritura në raundet e mëparshme.

“Ne si qeveri do të shtrojmë cështjen e moszbatimit të marrëveshjes për tregtinë e lirë dhe atë të vulave doganore”, deklaroi Tahiri.

Ajo shtoi se, bisedimet do vazhdojnë deri në momentin kur Bashkimi Evropian të shterojë të gjitha mjetet diplomatike për të bërë presion ndaj Beogradit për zbatimin e pakteve.

Raundi i fundit mes palëve ka qenë ai i dy shtatorit në Bruksel, ku u arritën dy marrëveshje, ajo për vulat dhe doganat, si dhe ajo për regjistrin kadastral.

Top Channel