Turqia nis kërkimet për naftë në Qipro

Ankaraja ka paralajmëruar se do të vijojë këtë ekspeditë nëse qipriotët grekë nuk anulojnë planet e tyre analoge në jug të vendit.

Qipriotët grekë insistojnë se u takon atyre e drejta për të kërkuar gaz dhe naftë, por Turqia kundërshton me pretendimin se burimet natyrore “offshore” u përkasin të dyja komuniteteve të ndara nga ishulli.

Tani që Qiproja është vend anëtar i BE-së, diskutimet mbi sovranitetin e tij përbëjnë një pengesë të madhe për anëtarësimin e mundshëm të Turqisë në bllokun evropian.

Pamjet direkte të anijes “Piri Reis” teksa linte portin e Izmirit u transmetuan në televizionin publik turk. Anija nuk mbrohej nga mjete lundruese ushtarake, sikundër ishte paralajmëruar më herët nga qeveria turke.

Tensionet në rajon u ngritën pasi qipriotët grekë njoftuan të martën se gërmimet për naftë dhe gaz kishin filluar në një zonë jug-lindore, duke prekur ujërat territoriale të Izraelit.

Gërmimet po kryhen nga kompania me bazë në Teksas, Noble Energy. Kryeministri Erdogan e ngriti cështjen në fjalë edhe në Asamblenë e Përgjithshme të OKB ditën e enjte.

Turqia nuk e njeh Qipron, që është ndarë që nga viti 1974 në pjesën veriore të kontrolluar nga Turqia dhe në pjesën jugore të kontrolluar nga Greqia.

Muajin e kaluar qeveria greke e Qipros njoftoi se po planifikonte të fillonte kërkimet për naftë në ujërat e ishullit. Ankaraja e bëri të qartë se ajo nuk ka juridiksion dhe kërkoi ndërprerjen e shpimeve.

Si Kombet e Bashkuara edhe Bashkimi Europian i kanë bërë apel të dyja palëve të tregojnë vetëpërmbajtje dhe të arrijnë sa më shpejt në një zgjidhje.

Top Channel