BE: Nuk do ta braktisim Greqinë

“Një falimentim i pakontrollueshëm, ose një dalje e mundshme e Greqisë nga eurozona do të shkaktonte dëme shumë të mëdha ekonomike dhe sociale jo vetëm për Greqinë, por për gjithë BE-në dhe ekonominë botërore”, ka deklaruar komisioneri për Cështjet Financiare, Olli Rehn.

“Ne nuk do të lejojmë që kjo të ndodhë”, ka nënvizuar Rehn, i cili megjithatë nuk e përjashtoi në mënyrë të prerë mundësinë e falimentimit të Greqisë.

Qeveria greke deklaron se masat e forta të marra prej saj janë një përpjekje për të siguruar vazhdimin e mbështetjes së kreditorëve ndërkombëtarë dhe për të shmangur falimentimin për shkak të borxhit.

Vendet e eurozonës dhe FMN kanë vendosur së fundmi këstin tjetër të ndihmës prej 110 miliardë eurosh për të ndihmuar Greqinë në përballjen me krizën e borxhit.

Pas një mbledhjeje maratonë prej gjashtë orësh, qeveria Papandreu shpalli masat e reja financiare, të cilat janë konsideruar si një tsunam i ri për qytetarët grekë.

Në shenjë proteste, i gjithë shteti helen u përfshi sot nga një grevë e sektorit publik, me ndërprerjen e shërbimeve të taksive, autobusëve, trenave dhe avionëve.

“Situata është dramatike, të gjitha rrugët kryesore të qytetit janë bllokuar”, ka deklaruar një polic trafiku në Athinë për agjencinë e lajmeve “Reuters”.

Top Channel