PS: Të tjera fakte për kromin

Pavarësisht padisë së dy zyrtarëve të lartë, zoti Tahiri tha se socialistët do të vazhdojnë hetimet e tyre mbi skandalet e njëpasnjëshme ku janë të përfshirë jo vetem Kuliçaj e Ruli, por sipas tij edhe drejtues të tjerë qendrore e lokalë.

“Nuk kam gënjyer kur kam thënë se në Bulqizë po konsumohet një Gërdec i heshtur, nuk kam gënjyer kur kam thënë se minatorët po vuajnë korrupsionin e qeveritarëve, nuk kam gënjyer se sot bëhet kontrabandë minerar, nuk kam gënjyer kur kam thënë se Genc Ruli ka shtyrë gjobat për firmën konçesionare në Bulqizë”, thotë deputeti Tahiri.

Sipas socialistit Tahiri, çështja e kromit në Bulqizë do të zbardhet plotësisht ndaj, sic tha ai, zyrtarët e qeverisë bëjnë mirë të japin përgjigje për to e të mos ngrenë padi të kota që synojnë të shmangin vëmendjen nga skandalet

“Është për të ardhur keq që po të njëjtët njerëz të cilët duke korruptuar drejtësinë kanë mbyllur skandalet e tyre, sot po keqpërdorin drejtësinë për t’i mbyllur gojën opozitës. Ulja e reputacionit është cinike dhe qesharake. Nëse Ruli reputacionin e fiton me milionat që fiton me korrupsionin, unë nuk mund të heq dorë nga e vërteta”, deklaron zoti Tahiri.

Pak ditë pasi deputeti Tahiri publikoi në parlament dokumente që sipas tij provojnë abuzimet e Rulit, në kohën kur drejtonte Ministrinë e Ekonomisë, Ruli njoftoi dorëzimin e një padie për shpifje ndaj Tahirit. Të njëjtën padi ngriti edhe zv/drejtori i Përgjithshëm i Policisë, Agron Kuliçaj.

“ACR e krijuar nga njerëzit e Rulit”

Që nga shfrytëzimi i pasurive minerare të Bulqizës nxirren përfitime të konsiderueshme, këtë e dëshmon numri i dhjetëra firmave private që punojnë në minierën e Bulqizës.

Në këtë histori të komplikuar shoqërish tregtare, që kanë përfituar disa dhjetëra miliona dollarë në vit nga shfrytëzimi i minierës së Bulqizës, opozita dëshmoi se ka patur marrëveshje zyrtare për të toleruar shkeljen e marrëveshjes nga ACR-ja.

Një marrëveshje, që sipas deputetit Sajmir Tahiri, është shndërruar në një marrëdhënie korruptive, ku në epiqendër ai vendos ish-ministrin e Ekonomisë Genc Ruli. Fillimisht, Tahiri deklaroi emrat dhe lidhjet e përfaqësuesve të Darfo dhe me pas të ACR-së, të cilët sipas tij rezultojnë të jenë pothuajse të njëjtët.

“Përfaqësuesit kanë qenë Eduard Belegu, ish-funksionar i Metës dhe Kristo Robi, që Genc Ruli e njeh shumë mirë. Ky i fundit, shok klase dhe mik i ngushtë me Rulin. Duket se me miratimin e Rulit, shoku i tij të drejtën për të shfrytëzuar minierën e kaloi nga Darfo tek ACR, që e kishte krijuar vetë”, deklaroi Tahiri.

Për ish-ministrin e Ekonomisë Genc Ruli, deputeti Tahiri tha se në 17 shkurt 2009 kishte pezulluar marrëveshjen me ACR-në dhe vetëm dy ditë më vonë kishte firmosur më ta një marrëveshje për të shtyrë me disa vjet planin e investimeve.

Më pas, sipas zotit Tahiri, ministri Ruli kishte pranuar më 9 korrik, një ditë pas kërkesës së ACR-së, të modifikonte sërish marrëveshjen, këtë herë për të shtyrë shlyerjen e penaliteteve, të vendosura po prej tij.

Modifikimi i kësaj marrëveshjeje nuk u miratua në Parlament dhe Partia Socialiste thotë se ajo është e pavlefshme.

“Më e pakta që mund të kuptohet ishte qarku i shkurtër dhe kontrata nën tavolinë e bërë nga Genc Ruli dhe shoku i tij në ministri”, theksoi deputeti Tahiri.

Aktualisht, në minierën e Bulqizës janë pezulluar të gjitha firmat që punonin aty, përfshirë sipas ministrit Naco, edhe atë që punonte në galerinë D, ku minatorët zhvilluan grevën e urisë.

Por Sajmir Tahiri, duke hedhur poshtë si të pavërtetë deklarimin e ministrit Naco, lexoi një e-mail të një jave më parë, nëpërmjet të cilit vëllai i kryetarit të Bashkisë së Bulqizës, pronar i firmës që punonte në sektorin D, komunikonte me ACR-në për të ritkhyer situatën në gjendjen e punës, gjë për të cilën kishte biseduar edhe me zyrtarë të ministrisë.

E vërtetë apo jë, të dyja palët e pranojnë se kjo është një histori interesash finaciare të ndërlikuara, por nuk japin të njëjtët emra. Përmendja e emrave nga Tahiri shkaktoi madje edhe tension në sallë.

“Pasi kam ndjekur dinamikën e kësaj greve, kam bindjen se drejtuesit e saj po përfitojnë mbi interesat e minatorëve, për t’u kthyer në biznesmenë dhe për të larguar ACR-në”, deklaroi Naco.

“Komanda e korrupsionit kalon nga Roland Keta, kryetar i bashkisë dhe kryetar i PD në Bulqizë. Vëllai i tij ka katër licensa. Vetë Ruli kontrollon një rrjet licensash që punon për të në Bulqizë. Rrjeti shkon deri tek të paprekshmit, ata pranë kryeministrit, si Agron Kuliqi. Kontrabanda niset që nga Bulqiza dhe shkon në Kinë dhe ndiqet nga Kristo Rodi”, u përgjigj Tahiri.

Ministri i Ekonomisë Nasip Naco i kërkoi zotit Tahiri të ndiqte rrugën ligjore për të verifikuar pretendimet e tij dhe nuk iu përgjigj akuzave direkte të deputetit socialist. Madje, këtë nuk e bëri as zoti Ruli, i cili ishte i pranishëm gjatë gjithë interpelancës.

Top Channel