![](https://top-channel.tv/wp-content/uploads/2024/07/aq_sd-800x450.jpg)
Rritja e re me 6 lekë për litër në taksat e karburanteve është vetëm masa e fundit në radhën e një politike disa vjeçare, që gjithmonë ka ecur në një drejtim. Atë të rëndimit të barrës fiskale.
Të dhënat tregojnë se krahasuar me vitin 2005, qeveria i ka rritur taksat mbi karburantet me mbi 20 lekë për litër.
Kjo është rritje direkte pa përfshirë të ardhurat shtesë që shteti merr nga rritja e çmimit.
Historia nisi me akcizën, e cila në vitin 2005 ka qenë e fiksuar në nivelin 27 lekë për litër.
Që nga ajo kohë qeveria e ka rritur akcizën dy herë duke e çuar atë në 37 lekë për litër, që është dhe niveli aktual.
Ky ishte vetëm hapi i parë që u pasua nga të tjerë, gjithmonë në të njëjtin kah atë të rritjes së barrës.
Pas akcizës, qeveria ndërhyri në taksën e karbonit duke e rritur atë nga 1 në 3 lekë për litër.
Dhe menjëherë pas kësaj, që prej dy ditësh ka hyrë në fuqi një taksë e re shtesë, e ashtuquajtur taksa e qarkullimit, e cila nuk ka ekzistuar, por që këtej e tutje do të jetë 5 lekë për litër.
Në total rritja direkte nga akciza, taksa e karbonit dhe ajo e qarkullimit është 17 lekë për litër.
Mbi këtë barrë llogaritet edhe efekti i tatimit mbi vlerën e shtuar, i cili e shton barrën edhe me 3.4 lekë të tjera, duke e çuar atë në total 20.4 lekë taksa shtesë për çdo litër karburant krahasuar me vitin 2005.
Veç këtyre rritjeve direkte qeveria ka përfituar edhe nga kërcimi i çmimeve të naftës në treg, që i mundëson asaj të mbledh më shumë tatim mbi vlerën e shtuar.
Si rezultat, qeveria i merr qytetarëve si taksa 90 lekë për çdo litër naftë që ata blejnë në treg.
Që do të thotë më shumë se gjysma e çmimit të naftës është takes dhe pjesa tjetër është kosto prodhimi, transporti apo fitim tregtarësh.
Top Channel