Autoritetet norvegjeze mendojnë të kërkojnë një dispozitë të re të kodit
penal për “krime kundër njerëzimit” ndaj Anders Behring Breivik, që ka
pranuar autorësinë e sulmeve të së premtes në Oslo.
Lajmin e bën të ditur prokurori i cështjes që ka si të pandehur 32-vjecarin, i cituar nga të përditshmet lokale.
E futur në kodin penal norvegjez në vitin 2008, norma mbi krimet kundër njerëzimit parashikon një dënim maksimal prej 30 vjet burg.
Ndërkohë, policia norvegjeze është e bindur se Breivik ka vepruar i vetëm dhe jo i ndihmuar nga celula të jashtme në atentatet e së premtes, që u morën jetën 76 personave.
Ditën e djeshme, në daljen e parë para trupit gjykues, 32-vjecari deklaroi se kishte vepruar i mbështetur nga grupe të tjera të ekstremit të djathtë.
“Vlerësojmë se i akuzuari ka një besueshmëri të ulët përsa i përket kësaj deklarate. Megjithatë, askush nga ne nuk mund të përjashtojë mundësinë që ajo të jetë e vërtetë”, ka deklaruar policia e Oslos.
Ne mendjen e 32-vjecarit
Një grup doktorësh do të bëjnë një vlerësim të shëndetit mendor të Anders Behring Breivik, për të parë nëse ai është i aftë për t’u përballur në gjykatë.
Por cfarë mund të vlerësojnë ata? Eksperti Jeremy Coid, profesor i psikiatrisë kriminalistike në kolegjin Queen Mary të Londrës, thotë se ka shumë mundësi që pas ideologjisë së 32-vjecarit të ketë një nivel të thellë crregullimi mendor.
“Vija e fundit është se ne nuk dimë, të paktën për momentin, aq sa duhet mbi motivet e tij për të diagnostikuar gjendjen mendore. Megjithatë, meqenëse janë të gjitha llojet e “prerjes tërthorazi” me ideologjinë e ekstremit të djathtë, unë besoj se ai vuan nga një crregullim mendor”, deklaron Coid.
“Ai e ka kaluar kufirin e ideologjisë ekstreme. Por e keqja qëndron në një detaj dhe ne duhet të kuptojmë më shumë mbi motivet e tij”, shton eksperti i kriminalistikës.
Hetuesit norvegjezë i kanë përqendruar hetimet tek pikëpamjet e djathta të Breivik, i cili kishte publikuar një dokument me 1500 faqe që shpjegonte ideologjinë në fjalë.
Top Channel
