Gjendet i vdekur ish-gazetari i “NoW”

Sean Hoare i kishte thënë “New York Times” se praktika ishte shumë më e gjerë nga sa thuhej kur policia nisi për herë të parë hetimet mbi këtë cështje.

Policia ka deklaruar se trupi i gazetarit u gjet në një pronë në Lengli Road, në Uotford, mëngjesin e sotëm.

Një zëdhënës i policisë ka bërë të ditur se rrethanat e vdekjes janë ende të paqarta.

“Në orën 10:40 të ditës së sotme policia u thirr në Lengli Road, pas shqetësimeve për shëndetin e një personi që jeton në një nga shtëpitë e rrugës”, ka deklaruar zëdhënësi.

“Pasi policia dhe ambulanca arritën në vendngjarje, u gjet edhe trupi i personit. Ai u shpall i vdekur në vendin ku u gjet vetëm pak minuta më vonë”, ka shtuar ai.

Zoti Hoare kishte deklaruar për BBC se përgjimi i telefonave ishte një fenomen “endemik” në redaksinë e “News of the World”.

Ai kishte thënë gjithashtu se redaktori i dikurshëm Andy Coulson i kishte kërkuar atij që të përgjonte telefonat, gjë të cilën Coulson e ka mohuar.

Top Channel